«Тĕрленĕ Пушкăртстан» курав уçăлĕ

ПР Наци музейĕн пресс-служби пĕлтернĕ тăрăх, асăннă мероприяти «Пушкăртстанăн тĕрленĕ картти»  республика проектне малалла тăсать. Ăна 2023 çулта Пушкăртстан Республикин Пуçлăхĕн Радий Хабировăн гранчĕпе пурнăçа кĕртнĕ. Проект Шупашкар хулинчи «Тĕрленĕ Раççей» Пĕтĕм Раççейри фестивале хутшăннă.

Выставка проектне Пушкăртстанри Культура министерствипе Наци музейĕ пулăшу панипе Республикăри халăх пултарулăхĕн центрĕ йĕркеленĕ.

«Тĕрленĕ Пушкăртстан» фестивале хутшăнакансем – карттăсене тĕрлекенсем — республикăн тĕрлĕ кĕтесĕсенче пурăнакан тĕрĕ ăстисем, профессиллĕ художниксем, çавăн пекех пултарулăх студийĕсен, пĕрлешÿсен, коллективсен, мастерскойсен, предприятисен, вĕренÿ заведенийĕсен, музейсен представителĕсем. Пир-авăр хатĕрлес ĕçе 500 ытла çынна явăçтарнă.

«Тĕрленĕ Пушкăртстан» курав республикăри пĕлтерĕшлĕ районсемпе хуласен карттисемпе паллаштарать. Вĕсене пирĕн тăрăхри халăхсен тĕрлĕ тĕрĕ меслечĕсене усă курса тĕрленĕ. Çавăнпа ĕçсем куракансене хăйсен фантазийĕпе тата пахалăхĕпе тĕлĕнтерĕç.