Республикăри тата 143 картише çĕнетĕç

«Вĕсенчен 18-че ĕçсене вĕçленĕ ĕнтĕ, 125-че хĕрÿ ĕç пырать, вĕсене сентябрь вĕçленичченех пурнăçлăпăр. «Пушкăрт картишĕсем» программăна эпир нимĕнле йывăрлăхсене пăхмасăр пулăшатпăр», - палăртнă Радий Хабиров.

Çапла, юлашки пилĕк çул хушшинче, 2019 çултанпа, регионта 1326 çурт çумĕнчи территорине йĕркене кĕртнĕ. Вĕсенче ача-пăча тата спорт площадкисем вырнаçтарнă, машинăсем тăратма хушма вырăнсем йĕркеленĕ, подъезд çулĕсене асфальт сарнă.

«Пурăнакансем «Пушкăрт картишĕн» кашни проектне çирĕплетеççĕ, хăйсен шухăшĕсене пĕлтереççĕ. Асăннă программа республикăри чи анлă сарăлнисенчен пĕри шутланать. Çитес çул унта тата 120 çурт кĕртме палăртатпăр», - пĕтĕмлетсе каланă Пушкăртстан Пуçлăхĕ.

«Пушкăрт картишĕсем» республика бюджечĕн тăкакĕсем енĕпе чи пысăк программа пулса тăнă. 2019 çултанпа регионта нумай хваттерлĕ 2153 çурта пĕрлештерекен 1326 картише хăтлăх кĕртнĕ. Ĕçсене пурнăçлама 6,5 миллиард тенкĕ тăкакланă. Проекта кĕнĕ çуртсенче 400 пин çын пурăнать. Кăçал асăннă программа валли 1 миллиард тенкĕ уйăрнă.