«Герой партти» ентешĕн çутă сăнне манăçа кăлармĕ

Сентябрь уйăхĕн 2-мĕшĕнче Авăркас тăрăхĕнчи Пишкайăн ялĕнчи шкулта Пĕлÿ кунне паллă тунисĕр пуçне тата тепĕр пĕлтерĕшлĕ те паллă пулăм пулса иртнĕ. Шăпах çак кунхине пĕлÿ çурчĕн выпускникне, ятарлă çар операцинче паттăрсен вилĕмĕпе вилнĕ Алексей Семенович Иванова халалласа «Герой партти» тата асăну хăми уçнă.

«Герой партти» - вĕренÿ сĕтелĕ, ун çине Паттăрăн сăн ÿкерчĕкне, унăн кун-çулĕпе паттăрлăхĕ çинчен каласа паракан информацие вырнаçтарнă.

Ăна уçассипе çыхăннă церемоние Пишкайăн ял хутлăхĕн пуçлăхĕ Владимир Евстафьев, Авăркас район Канашĕн депутачĕ Виталий Тарасов, хăюллă салтака пурнăç парнеленĕ Семен Давыдовичпа Галина Григорьевна Ивановсем, педагогика ĕçĕн ветеранĕсем, вĕрентекенсемпе вĕренекенсем тата вĕсен ашшĕ-амăшĕсем хутшăннă.

- Çĕршывăн паттăрĕсене асра тытасси пирĕн тĕп тивĕç шутланать. Алексей Семенович – чăн-чăн паттăр, вăл хăюлăх кăтартса, хăйĕн пурнăçне шеллемесĕр пире тата Тăван çĕршыва хÿтĕлерĕ. Унăн çутă сăнарĕ ĕмĕрех пирĕн асра тăрса юлĕ. Пуç çийĕнче мирлĕ тÿпе пултăр. Кашни кун савăнăçпа телей çеç парнелетĕр, ачасен хаваслă кулли илтĕнтĕр, - тенĕ шкул директорĕ Луиза Яковлева.

Çак кун шкула пухăннисем Паттăр ячĕпе чылай ăшă сăмах каланă. Астăвăм, ăнлану тата хисеп туни ашшĕ-амăшĕн çухату-ыратăвне кăшт та пулсан çемçетме пултарасса шаннă.

Авăркас районĕ, Пишкайăн ялĕ.