Вĕрене мĕн чухлĕ явсан та унăн вĕçĕ пулатех

2018 çулхи тăхăр уйăх хушшинче Пушкăртстанра 6000 преступлениллĕ ĕçе уçăмлатнă. Çав шутра çын вĕлернипе çыхăннă 170, çын сывлăхне сиен кÿнĕ 400 ытла (78-шĕ вилĕмпе вĕçленнĕ) ĕç пулнă. Унсăр пуçне 46 çынна пусмăрланă, 471 çаратнă, 126 хурахла ĕç тунă, 5000 вăрланă (400-шĕ хваттерпе çыхăннă, 432-шĕ автомобильпе), 270 автотранспорт вăрласа кайнă, 700 улталаса тунă ĕçе тăрă шыв çине кăларнă.

- Чи хăрушă тĕслĕхсенчен пĕри - упăшки хăйĕн гражданла мăшăрне вĕлерни. Çак ĕçе 2018 çулхи февраль уйăхĕн 8-мĕшĕнче уçăмлатрăмăр. Вилнĕ хĕрарăм ÿтне вара 2017 çулхи декабрь уйăхĕн 15-мĕшĕнченех шырама пуçланăччĕ. Февраль уйăхĕн 11-мĕшĕнче тепĕр преступлениллӗ ĕçе - Ĕпхÿ хулинчи Инорс микрорайонĕнче çынна пăшалпа персе вĕлернĕ тĕслĕхе - уçса патăмăр. Çак ĕçпе çыхăннă икĕ киллера тата преступлениллĕ ĕçе тума хушакана тытса чартăмăр, - пĕлтернĕ ПР ШĔМ Уголовлă шырав управленийĕн начальникĕ, полици полковникĕ Рамиль Ермеев. - Çаплах Çтерлĕ хулинче çын вĕлернĕ ĕçе те тăрă шыв çине кăлартăмăр. Асăннă тĕслĕхре арçын хăйĕн автомобильне сутма шутланă хыççăн çухалнă. Каярах унăн машинине тата ÿт-пÿне хула хĕрринче тупрăмăр. Çын вĕлерекене арестленĕ.

Ултавçăсемпе çыхăннă ĕçсене уçăмлатнă май полицейскисем ытларах тĕнче тетĕлĕнчи мошенниксемпе тата ватă çынсене улталакан преступниксемпе тĕл пулаççĕ.

Надежда РОДИОНОВА.