Экологи субботникĕсем пуçланĕç

Апрель уйăхĕн 6-мĕшĕнче Пушкăртстанра тирпей-илем кĕртес уйăхлăх пуçланать. Вăл май уйăхĕн 11-мĕшчен пырĕ.

Уйăхлăхпа килĕшÿллĕн экологи субботникĕсем иртĕç.

- Апрель уйăхĕн 6-мĕшĕнче тавралăха çÿп-çапран тасатĕç, 20-мĕшĕнче тирпей-илем кĕртĕç, юсамаллисене юсĕç, йывăç лартĕç, - тенĕ ПР пурăнмалли çурт-йĕрпе коммуналлă хуçалăх министрĕн тивĕçĕсене пурнăçлакан Михаил Киреев.

Муниципалитет шайĕнче ĕç коллективĕсене, студентсемпе вĕренекенсене çак ĕçе явăçтарассине йĕркелемелле, вĕсене ĕç хатĕрĕсемпе тивĕçтермелле. Хуласенче апрель уйăхĕн 20-мĕшĕнче коммуналлă техникăн парадне ирттермелле.

ПР Пуçлăхĕн тивĕçĕсене вăхăтлăха пурнăçлакан Радий Хабировăн сăмахĕсем тăрăх, тирпей-илем кĕртессипе çыхăннă тĕп мероприятисене май уйăхĕн 1-мĕшĕ тĕлне вĕçлемелле. Çанталăк начар пулсан, май уйăхĕн 7-мĕшĕнче.

Надежда РОДИОНОВА.