Юхан шыв хĕрринче машина çунăшăн штраф тÿлеттернĕ

«Симĕс патруль» юхăмăн хастарĕсем Толбазă ялĕнчи Корья юхан шывĕ хĕрринче çăмăл машинине çунă водителе штраф тÿлеттермелле тунă. ПР Экологи министерстви пĕлтернĕ тăрăх, активистсем ведомствăна фото тата видеоматериалсем ярса панă. «Симĕс патруль» хастарĕсем асăрхаттарнине тимĕр ут хуçи шута та илмен, машинăна малалла çунă.

Арçынна 3000 тенкĕ штраф панă. Сăмах май, укçа-тенке тепĕр енчен те шутлама пулать: Ĕпхÿре машинăна автомойкăра çутарнăшăн 500 тенкĕ илеççĕ, енчен хăв çăватăн пулсан - 150 тенкĕ.

Шыв кодексĕпе килĕшÿллĕн, шыв сыхлавĕсен çывăхĕнче тĕрлĕ техника çума юрамасть.

Надежда РОДИОНОВА.