Вăрăм ĕмĕрлисем сахал мар

Пирĕн регионта вăрăм ĕмĕрлĕ çынсем çук мар. ПР Пенси фончĕн уйрăмĕ пĕлтернĕ тăрăх‚ паянхи кун 1‚2 млн пенсионер пурăнать. Вĕсенчен 143 пинĕ 80 çултан иртнĕ.

- 80 урлă каçнисем кăна мар, пĕр ĕмĕр чиккинчен иртнисем те чылайăн. Пушкăртстанра 100 çул тултарнă 176 çын пурăннине шута илнĕ. Вĕсенчен 82 пенсионер кăçалхи çул хăйсен пĕр ĕмĕрлĕ юбилейне паллă тунă‚ - тенĕ Раççейри Пенси фончĕн регионти уйрăмĕн ертÿçи Фоат Хантимеров.

Ватăсене сума сăвасси - пирĕншĕн чи пирвайхи тивĕç. Çавна май ООНăн Генеральнăй ассамблейи 1990 çулта октябрь уйăхĕн 1-мĕшне Пĕтĕм тĕнчери ватăсен кунĕ тесе йышăннă. Раççейре вара çак куна 1992 çултанпа уявлаççĕ.

- Кăçалхи çул пенсипе уйăхсерен парăнакан тÿлеве саплаштарма 169 млрд тенкĕ тăкакланă. 80 çултан иртнĕ пенсионерсем ÿстернĕ пенсие илме тивĕçеççĕ. Ватлăх çулĕсене шута илсе страхлав пенси çумне 5 334‚19 тенкĕлĕх тÿлев хушăнать. 80 çул тултарсан çак укçа-тенкĕ икĕ хут нумайрах ÿсет. Вăл 10 668‚38 тенкĕпе танлашать. Тÿлеве илес тесен тепĕр хут заявлени çырма кирлĕ мар‚ - ăнлантарса панă Пушкăртстанри Пенси фончĕ уйрăмĕн пуçлăхĕ.