Вăраха тăсăлнă уявсен пĕтĕмлетĕвĕсем

Пушкăртстан пуçлăхĕ Радий Хабиров вăраха тăсăлнă уявсен пĕтĕмлетĕвĕсене тунă. Ун шухăшĕпе‚ чи пĕлтерĕшли кунта пушарсемпе вилнисен шучĕ чакнинче.

«Вăраха тăсăлакан уявсенче чи хăрушши - пушарсем. Январь уйăхĕн пĕрремĕш кунĕсенче вут-çулăма пула ялан çĕршер инкек курнă‚ вĕсенче вилнисемпе аманнисен‚ пурăнмалли вырăнсăр юлнисен шучĕ теçетки-теçеткипе... Çак хăрушă кăтартусене чакарас тесе çулталăкĕпе ĕçлетпĕр. Пушар çинчен пĕлтерекен ятарлă приборсем вырнаçтаратпăр‚ килĕрен çÿретпĕр‚ хăрушлăх ушкăнне кĕрекенсемпе ĕçлетпĕр. Кăтартусем курăмлă. Иртнĕ çулхипе танлаштарсан‚ кăçал пушарсен шучĕ 4 хут‚ вилекенсен шучĕ 80% чакнă. Пушарсемпе‚ ĕçкĕпе‚ çул-йĕр çинчи инкексемпе кĕрешесси йăлăхтарса çитернĕ пулсан та çак ĕçе малалла тăсăпăр. Мĕншĕн тесен кашни цифра хыçĕнче ентешсен арканнă пурнăçĕ. Хăвăра упрăр‚ тепĕр хут сире уявсем ячĕпе!», - çырнă вăл хăйĕн Facebook страницинче.

МЧС пресс-служби пĕлтернĕ тăрăх‚ Пушкăртстанра çулталăк пуçланнăранпа 134 пушарта 4 çын вилнĕ‚ виççĕшĕ йывăр суранланнă. Иртнĕ талăк хушшинче 20 пушар тухнă‚ телее кунта вилнисемпе суранланнисем çук. Пушарсен тĕп сăлтавĕ - уяв кунĕсенче вут-çулăмпа асăрхануллă пулманни‚ электричествăпа ĕçлекен хатĕр-хĕтĕрпе‚ кăмакасемпе тĕрĕс усă курманни.

Инга ВАСИЛЬЕВА.