Январь уйăхĕнче 50 йĕкĕреш çуралнă

Пушкăртстанри граждан тăрăмĕн акчĕсене çыракан пай (ЗАГС) 2020 çулхи январь уйăхĕнче 50 йĕкĕреш çуралнине çирĕплетнĕ. Республикăри Юстици ĕçĕсен патшалăх комитечĕн пресс-служби пĕлтернĕ тăрăх‚ Алияпа Артур Садыков йĕкĕрешсем январь уйăхĕн 31-мĕшĕнче хăйсен пĕрремĕш документне илнĕ. Пепкесем Белорецк хулинче пурăнакан Русланпа Фания çемйинче январь уйăхĕн 23-мĕшĕнче çуралнă.

Кармаскалă районĕнчи граждан тăрăмĕн акчĕсене çыракан пай ĕçченĕсем январь уйăхĕн вĕçĕнче Багдановсен çемйине йыш хушăннипе саламланă. Гульназпа Ильфак çемйинче Тимур ятлă ывăл ÿснĕ-ха‚ халĕ тата Артурпа Руслан ывăлсем хутшăннă.

Янаул хулинче Нургалиев йĕкĕрешсем çут тĕнчене килнĕ. Динара амăшĕпе Рамиль ашшĕ вĕсене Нурэл тата Байэл тĕлĕнтермĕш ятсем панă. Арçын ачасене килĕнче виçĕ аппăшĕ кĕтнĕ.