Ял сăнĕ улшăнĕ

Пушкăртстанри ялсен инфраструктурине аталантарма çитес виçĕ çул хушшинче 5,5 миллиард тенкĕ уйăрма палăртаççĕ. Вĕсенчен 3 миллиардне федераллă бюджетран, 1,7 миллиардне республика бюджетĕнчен, 174 миллиона вырăнти бюджетсенчен тата 666 миллион тенке бюджета кĕмен çăлкуçсенчен уйăрĕç.

ПР вице-премьерĕ – ял хуçалăх министрĕ Ильшат Фазрахманов правительствăри оперативлă канашлура федераллă укçа-тенке явăçтарассипе Пушкăртстан малта пыракан виçĕ регион шутне кĕнине пĕлтернĕ. Республикăн пайĕ (57,4 миллиард тенкĕрен) 5,2 процентпа танлашать. Муниципаллă районсене уйăракан субсиди кăçал 1 миллиард та 600 миллион тенке яхăн. «Ял территорийĕсене комплексла аталантарасси» патшалăх программине пурнăçлама 2020-2022 çулсенче федераллă бюджетран 432, 9 миллиард тенкĕ уйăрма палăртнă, чăннипе (автомобиль çулĕсене шута илмесен) 57,4 миллиард тенкĕ хута янă. Паянхи куна 2021-2022 çулсенче «Ял территорийĕсен хальхи сăнĕ» программăна аталантарма палăртнă 16,8 миллиард тенке ĕçе яман-ха.
Пушкăртстан пуçлăхĕ регионти Ял хуçалăх министерствине ялсен инфраструктурине лайăхлатассипе ĕçленĕшĕн тав тунă. Радий Хабиров сăмахĕсем тăрăх, ведомствăн хута яман 17 миллиард шутĕнчен хушма укçа тупас тесе хастар ĕçлемелле.
Инга АЛЕКСЕЕВА.

Читайте нас