Сăвăссенчен 8 пин çын асап курнă

Ĕпхÿри мэринче иртнĕ оперативлă канашлура Роспотребнадзор Управленин ĕçченĕ Зульфия Камаева Пушкăртстанра сăвăссенчен асап курнисен хисепĕ ÿсни çинчен пĕлтернĕ.

- Июль уйăхĕн 7-мĕшĕ тĕлне Пушкăртстанри медицина учрежденийĕсенче сăвăссенчен хур курнă 8 100 çын пулăшу илнĕ. Вĕсенчен 3 111 – ачасем, - палăртнă вăл. - Пĕршер çын сăвăсăн энцефалит вирусĕпе тата боррелиоз инфекцийĕпе чирленĕ.

Пушкăртстанри Гигиенăпа эпидемиологи центрĕнче çынсем çинчен илнĕ 7,3 пин сăвăса тĕпченĕ. Энцефалит вирусĕпе чирлекенсен шучĕ 1,1 процентпа танлашнă.

- Чи кирли - çынсем хăйсем хÿтĕленни. Кунта сăвăссем пур вырăнсенче паллă йĕркесене пăхăнни, тумтире тĕрĕс тăхăнни, сăвăссенчен хÿтĕленмелли хатĕрсемпе усă курни пысăк вырăн йышăнать, - палăртнă Зульфия Камаева.