Сăвăссенчен асап курнисен хисепĕ ÿсет

ПР Роспотребнадзор управленийĕ Пушкăртстанра кăçал сăвăссем ÿт çумне çыпçăннин тĕслĕхĕсем иртнĕ çулхипе танлаштарсан 3,7 процента чылайрах пулнине пĕлтерет.

Хальхи вăхăтра сăвăссем тапăннипе 9 064 çын медицина учрежденине пулăшу ыйтма килнĕ, вĕсенчен 3 455-шĕ - ачасем. Танлаштарма, иртнĕ çул çак вăхăт тĕлне сăвăссенчен шар курнă 8 732 çын медицина пулăшăвĕ ыйтнă, вĕсенчен 3 209-шĕ ачасем пулнă.

Сăвăссем хăрушă инфекцисене – энцефалитпа боррелиоз (болезнь Лайма) – чирĕсене – саракансем шутланаççĕ.

Республикăри Гигиена тата эпидемиологи центрĕнче тата унăн филиалĕсенче энцефалитпа боррелиоз инфекцийĕсем сăвăссенче пуррипе çуккине тĕрĕслеççĕ. Тĕпчев ирттерекен лабораторисен адресĕсене ПР Роспотребназдор управленин сайтĕнче пĕлме пулать.