Ĕпхÿ хули тăрăх çÿрекен икĕ хутлă турист автобусĕн маршручĕ паллă. Пушкăртстанри Туризм енĕпе ĕçлекен патшалăх комитечĕ пĕлтернĕ тăрăх‚ экскурисем кашни эрне кунпа шăмат кун иртĕç. Вĕсем «АРТ-Квадратран» (М.Карим ячĕллĕ урам‚ 2 çурт) патĕнче пуçланса çавăнтах вĕçленĕç.
Маршрута истори урамĕсене – Ленинпа Карл Маркс‚ Достоевскипе Мустай Карим‚ Кировпа Мажит Гафури‚ Заки Валидипе Тукай‚ Зайнулла Расулевапа Советская‚ Пушкинпа Цюрупа‚ Сочинскаяпа Белая юхан шывĕн çыранĕ – кĕртнĕ.
Автобус малтанхи режимпа паянтан‚ октябрь уйăхĕн 2-мĕшĕнчен‚ ĕçлеме тытăннă. Экскурси билечĕсене вырăнтах туянма пулать.
Паянхи саманана тивĕçтерекен автобусра 59 вырăн. Ăна Ĕпхÿ хулине республика правительстви парнеленĕ.