Колони ĕçченне судпа айăпланă

Пушкăртстанра Салават хулинчи ИК-4 юсанмалли колони ĕçченĕ пулнă çынна взятка илнĕшĕн тата ĕçре хăйĕн должность полномочийĕсене ÿстернĕшĕн судпа айăпланă.

Тĕрĕслев вăхăтĕнче çакна тупса палăртнă, 2018 çулхи апрель уйăхĕнчен пуçласа 2019 çулхи май уйăхĕччен кĕçĕн инспектор саккуна пăсса тĕрмере ларакансене сим-картăллă, смарт-сехетлĕ карас телефонсемпе тивĕçтернĕ. Çакăншăн унăн ячĕпе банкри карта çине арестантсен тăванĕсемпе çывăх çыннисем укçа куçарса панă. Иртнĕ çулхи июнь уйăхĕнче, колони территорине виçĕ телефон илсе кĕме пуçланă чухне, ăна тытса чарнă.

Пакунлă çын хăйĕн айăпне йышăннă. Суд ăна патшалăха 1 млн тенкĕ штраф тÿлемелле тунă. Унсăр пуçне унăн 3 çул хушши уголовлă юсав системинче тата йĕрке хуралçисен органĕсенче ĕçлеме юрамасть.

Юрий МИХАЙЛОВ.