«Еврази королеви-2020» конкурсра Пушкăртстан хĕрĕ çĕнтернĕ

Ноябрь уйăхĕн 1-8-мĕшĕсенче Турцинче «Еврази королеви-2020» халăхсен хушшинчи илемлĕх конкурсĕ иртнĕ. Унта Пушкăртстан Республикин чысне Зухра Мухарямова хÿтĕленĕ.

Зухра Салават районĕнче çуралса ÿснĕ. Вăл 23 çулта. Хĕр - Пушкăрт патшалăх университечĕн выпускници. Зухра харпăр ĕç - илемлĕх салонĕ - пуçарса аталантарать. Унсăр пуçне вăл Малоязри шкулсенчен пĕринче ĕçлет. Хăй вăхăтĕнче Салават хĕрĕ «Пушкăртстан илемĕ - 2019» республика конкурсĕнче çĕнтернĕ‚ «Раççей студенчĕсен вице-мисĕ - 2017» титула тивĕçнĕ.

Конкурс шайĕнче «Пултарулăх мисĕ» (унта Зухра француз юррине юрланă)‚ «Бикини мисĕ»‚ «Чи илемлĕ наци тумĕ» (дизайнер - Альбина Жерлицына)‚ «Куракансем кăмăлланă мисс» тапхăрсем иртнĕ. Кашни тапхăрта Зухра малти вырăнсене çеç тивĕçнĕ.

Çĕнтерÿçе ылтăн алă сехечĕ‚ мамăк тиртен çĕленĕ япала‚ илемлĕ корона‚ парне ленти тата конкурс статуэтки парнеленĕ.

Ирида НОВИКОВА.