Çĕнĕ çул елкисен шăпи паллă

Пушкăртстанра шкул çулчченхи учрежденисенче Çĕнĕ çула уявлассипе çыхăннă ыйтăва татса панă: ачасем валли утренниксем йĕркелĕç‚ анчах кăшăлвируса пула чару мерисем те пулĕç. Çак хыпара ПР вĕрентÿ тата наука министрĕ Айбулат Хажин пĕлтернĕ.

- Шкул çулчченхи учрежденисенче Çĕнĕ çул утренникĕсем ушкăнсенче иртĕç. Шел‚ вĕсене ашшĕ-амăшĕсем‚ аслашшĕ-асламăшĕсем хутшăнаймĕç. Хĕл Мучипе Юр Пике тумĕсене тăхăннă аслисене тата операторсене явăçтармасса‚ утренниксене вĕрентÿ организацисен ĕçченĕсен вăйĕпе ирттерме сĕнетпĕр‚- тенĕ министр.

Ведомство пуçлăхĕ Кремль тата республикăн Тĕп Çĕнĕ çул елкисен шăписем çинчен те каласа панă.

- Республикăн Тĕп елкине çулсерен 800 ытла ача хутшăнатчĕ. Кăçал пандеми условийĕсене шута илсе ăна йĕркелеме май çук. Анчах парнесене туяннă‚ вĕсене ачасем патне вăхăтлă çитерĕпĕр. Кашни муниципалитет пуçлăхĕ çак парнесемпе ачасене хавхалантарĕ‚ – тенĕ Айбулат Хажин. – Кремль керменĕнче иртекен елка пирки калас пулсан‚ вăл та кăçал пулмасса пултарать.

Министр каланă тăрăх‚ шкулсенчи Çĕнĕ çул елкисене урамра ирттерме сĕнеççĕ.

Ирида НОВИКОВА.