Шкул ачисен хĕллехи каникулне тăсĕç-ши?

Пушкăртстанри вĕрентÿ тата наука министрĕ Айбулат Хажин «Пушкăртстан» патшалăх телерадиокомпанин «Интервью» кăларăмĕнче 2021 çулта шкул ачисен çĕнĕ çул каникулĕпе çыхăннă ыйту çине хуравланă.

- Графикпа килĕшÿллĕн хĕллехи каникулсем январь уйăхĕн 11-мĕшĕччен тăсăлаççĕ. Ун хыççăн вĕрентÿ процессĕ пуçланмалла. Анчах та хальхи вăхăтра федералсен шайĕнче иккĕмĕш вĕрентÿ çулĕн графикне сÿтсе яваççĕ. Раççей Федераци шайĕнчи COVID-19-па кĕрешекен оперативлă штаб йышăну тунă хыççăн эпир, паллах, çийĕнчех вĕренекенсемпе вĕсен ашшĕ-амăшĕсене çакăн çинчен пĕлтеретпĕр,- тенĕ министр.

Вĕренÿ çулĕн иккĕмĕш чĕрĕкĕ декабрь уйăхĕн 30-мĕшĕнче вĕçленет. Ку вăл каникул умĕнхи юлашки кун пулса тăрать.

Юрий СНЕГОПАД.