Пушкăрт чĕлхи кунне мĕнле мероприятисем йĕркелеççĕ?

Декабрь уйăхĕн 14-мĕшĕнче Пушкăртстан Республикин Пуçлăхĕн указĕпе килĕшÿллĕн Пушкăрт чĕлхи кунне уявлаççĕ. Уява пуçараканĕ - Пĕтĕм тĕнчери пушкăртсен курултайĕ.

Çак кунхине онлайн тата офлайн мелĕсемпе тĕрлĕ мероприятисем иртĕç. Вĕсен тĕллевĕ - пушкăрт чĕлхине тата пушкăрт халăхĕн культура пурлăхне сыхласа хăварасси‚ çулталăк пĕтĕмлетĕвĕсене тăвасси‚ маларах ирттернĕ конкурссен çĕнтерÿçисене чысласси.

Пушкăрт чĕлхи кунне халалланă пулăмсем:

- паллă çынсем хутшăнакан «Поэтическая цепочка» интерет-флешмоб;

- Пушкăрт патшалăх тата Пушкăрт патшалăх педагогика университечĕсенче Мифтахетдин Акмуллана халалласа ирттернĕ мероприятисем;

- Шайхзада Бабич çуралнăранпа 125 çул çитнине халалланă уçă урок;

- республикăри культура учрежденийĕсенче ирттерекен квестсемпе уяв мероприятийĕсем тата ыттисем те;

- Пермь крайĕнчи культурăпа информаци акцийĕ (курав‚ кĕнеке хăтлавĕ‚ вырăнти пушкăрт ушкăнĕсен концерчĕ);

- Пушкăртстан çыравçисен Эрĕнпурти пултарулăх тĕлпулăвĕ;

- пĕтĕмлетÿ концерчĕ‚ çĕнтерÿçĕсене чысласси.

Декабрь уйăхĕн 10-мĕшĕнче 102№ гимназинче «Бикбаев вулавĕсем» наукăпа практика конференцийĕ иртнĕ. Асăннă уйăхăн вун иккĕмĕш кунĕнче пушкăрт халăхне сыхласа хăварассипе çыхăннă çивĕч ыйтусене сÿтсе явĕç. Çав кунхинех «Башкирский язык: новый взгляд-2» веб-приложени хăтлавĕ те иртĕ.

Ноябрь уйăхĕнче вара професси пĕлĕвне паракан учрежденисенче пушкăрт чĕлхипе Республика олимпиади йĕркеленĕ пулнă.

Ирида НОВИКОВА.