Таштамаксем тракторлă пулнă

Авăркас районĕнчи Таштамак ял хутлăхĕнче пурăнакансем‚ вырăнти пуçарусене пулăшса пыракан программăна хутшăнса ял хуçалăх техники туянма йышăну тунă хыççăн‚ МТЗ-82 трактор илме тивĕçнĕ. Ял çыннисем кустăрмаллă трактор туянма кăмăл пуррине программăн пĕтĕмĕшле пухăвĕнче пĕлтернĕ.

Вырăнти пуçарусене пулăшса пыракан программăна пĕрремĕш хут мар хутшăнакан çынсем асăннă проекта пурнăçа кĕртес тесе пысăк тÿпе хывнă. Кунта пĕр-пĕр ыйтăва сÿтсе явнă чух кашни çын яваплă пулни пысăк пĕлтерĕшлĕ. Вĕсем çак йышăну ял хутлăхне усă кÿрессине тĕпе хунă.
- Трактор пурри çăмăллăх кÿрет, питĕ нумай ĕç тума пулать. Унччен вĕсене пурнăçлас тесен вырăнти хуçалăхсен ертÿçисемпе район предприятийĕсенчен пулăшу ыйтма тÿр килетчĕ‚ - тенĕ Таштамак ял хутлăх пуçлăхĕ Минсара Федорова. - Малашне чылай ыйтăва хамăр тĕллĕн татса парăпăр.
Ирида МАТНИЯЗОВА.
Авăркас районĕ.