Икĕ килограмм наркотик туртса илнĕ

«Киа Серата» автомобилĕн салонĕнче икĕ килограмм наркотик (каярах тĕпченĕ тăрăх‚ вăл гашиш пулнă) тупнă. Асăннă машина рулĕ умĕнче Сибай хулинче пурăнакан 32 çулхи арçын пулнă. Çул-йĕр инспекторĕсем ăна Тутарстан территорийĕнче тĕрĕслев ирттернĕ вăхăтра тытса чарнă.

- Çамрăк çынран ыйтса пĕлнĕ чух вăл наркотик хутăшне интернет-магазин урлă хăйне усă курма туяннă‚ ăна Мускавра вăрттăн вырăнтан илнĕ тесе пĕлтернĕ. Çапах та ун çумĕнче электрон тараса‚ наркотика уйăрмалли хутаçсем‚ çыпăçакан лента тупнă‚ - ăнлантарса панă Тутарстанри Шалти ĕçсен министерствин пресс-службинче.

Айăпланакана ярса тытнă‚ саккуна пăсса наркотик хутăшĕсем туса кăларнипе‚ упранипе‚ сутнипе çыхăннă статьяпа уголовлă ĕç пуçарнă.

Ирида НОВИКОВА.