Ачасене пĕтĕм чунтан юратса

Республикăри хевтесĕр ачасемпе çул çитмен çамрăксен реабилитаци центрĕн Пелепейĕнчи уйрăмне тĕрлĕ çулхи 31 ача çÿрет. Асăннă уйрăм вĕсене валли социаллă реабилитаци енĕпе комплекслă мероприятисем йĕркелет.

Çакă ачасемпе çамрăксене тулли пурнăçпа пурăнайманнине саплаштарма тата общество пурнăçне явăçтарма пулăшать. Коллективри çĕнĕ пурнăç опычĕ ачана çут тĕнчене шанма‚ çынсемпе çывăхланма‚ сивĕ кăмăллă пулмасса вĕрентет. Килти евĕр ăшă лару-тăру‚ юратупа тимлĕх хăйсене шанма май параççĕ. Пелепей уйрăмĕн специалисчĕсем ачасен пурнăçне тĕрлĕ уявсемпе пуянлатма тăрăшаççĕ. Кунта йăпанмаллипе пĕлÿ паракан‚ спорт тата вылямалли‚ юрă-кĕвĕ мероприятийĕсем иртеççĕ.
- Ачасен аталанăвĕнче юрă-кĕвĕ пĕлтерĕшлĕ вырăн йышăнать‚ - тет музыка ертÿçи Наталья Васильевна. - Аудио çине çыртарнă юрăсене‚ паллах‚ чĕрĕ сасăпа шăрантарнисемпе танлаштарма пулмасть.
Çакна шута илсе реабилитаци центрĕн ертÿçи ПР Патшалăх Пухăвĕн-Курултайĕн депутатĕнчен Фиял Байтеряковран юрă-кĕвĕ инструменчĕ туянма пулăшу ыйтнă. Çĕнĕ çул кунĕсенче асăннă центр воспитанникĕсемпе педагогсен ĕмĕчĕ пурнăçланнă. Вĕсене электропианино парнеленĕ.
- Ачасем - пирĕн пуласлăх. Çамрăк ăрупа ĕçлекен тата вĕсене пĕлÿ паракан педагогсем пулăшу ыйтсан айккинче юлма пултараймастпăр‚ - тенĕ Фиял Рифович хаклă парнене парнеленĕ май.
Реабилитаци уйрăмĕн ертÿçи Гульнара Гарифуллина депутата чунтан тав тунă, Ф.Байтеряков депутат пĕрремĕш хут мар пулăшу панине палăртнă.
Расима САБИТОВА. Пелепей хули.