Автомобильсенчен чĕре ĕлкине калăпланă

Ĕпхÿ хулинчи «Солнечный» пляжра водительсем автомобильсене умлă-хыçлă вырнаçтарса чĕре ĕлкине (форма) калăпланă.

Мероприятине Кооператив уçланкинчи (хулан пĕр пайĕ) пуçаруллă çынсен ушкăнĕ йĕркелесе пурнăçа кĕртнĕ. Вĕсене çак ĕçре Киров район администрацийĕ те пулăшнă тесе пĕлтернĕ хула мэрин пресс-служби.

Сăмах май каласан, Çĕршыв хÿтĕлевçисен кунĕнче те çакăн евĕр акци иртнĕ. Ун чухне хурçă утсене илемлĕ вырнаçтарса «çирĕм виççĕ» цифра çырнă пулнă. Ахăртех, хальхинче акцие йĕркелекенсем çак мероприятие ирттернĕ май, чипер пикесене те тивĕçлĕ тимлĕх уйăрас тенĕ пулмалла.

Юрий СНЕГОПАД.