Мелеуз районĕнче çÿп-çап полигонĕ çунать

Мелеуз районĕнче хула çывăхĕнче хупă территори çинче‚ йăлари хытă каяшсене вырнаçтаракан полигонра‚ çÿп-çап çунма пуçланă.

РФ Инкеклĕ ĕçсен министерствин Пушкăртстанри управленийĕн пресс-служби пĕлтернĕ тăрăх‚ вут-çулăм 150 тăваткал метр лаптăк çинче алхасать. Полигонăн пĕтĕмĕшле лаптăкĕ - 5 гектар.

Вырăнта сакăр техника единици тата 12 çын ĕçлет. Унсăр пуçне вут-çулăма сÿнтерме виçĕ самосвал‚ пĕр экскаваторпа бульдозер явăçтарнă. Çынсенчен жалоба килмен. Ведомство пĕлтернĕ тăрăх çÿп-çап çунни хулана хăрушлăх кăларса тăратмасть.

Çу кунĕсенче свалкăсем тăтăшах çунаççĕ. Кăçал Ĕпхÿ районĕнчи Черкассы поселокĕ çывăхĕнчи йăлари хытă каяшсен полигонĕ икĕ хутчен вут-çулăм айне пулнă. Çуннă‚ ĕннĕ шăршă Ĕпхÿ хулинче те сарăлнă. Хăш-пĕр сиенлĕ веществосем сывлăша сарăласси нормăран иртнине тупса палăртнă.

Ирида НОВИКОВА.