Радий Хабиров Çурçĕр полюса кайма хатĕрленнĕ

Аксаков ячĕллĕ мемориаллă музей-çурчĕн филиалĕн заведующийĕ Михаил Чванов (пирĕн паллă ентешĕн музейне пуçарса яраканĕсенчен пĕри) регион пуçлăхĕ патне сĕнÿпе тухнă:

 - Валериан Альбанов йĕрĕсем тăрăх тухнă арктика экспедици пайташĕсем унăн ĕçтешĕн япалисене тата кĕлетке юлашкийĕсене тупнă. Вĕсем Ĕпхÿ хулинче Полярниксен музейне уçнăшăн тата ăна аталантарассине Радий Фаритович Хабиров тÿпе хывнăшăн питĕ хĕпĕртеççĕ‚ – тенĕ Михаил Чванов çыравçă-краевед. – Халĕ экспедици пайташĕсем Арктикăра ĕçлеççĕ. Çитес çулта‚ Альбанов штурман çуралнăранпа 140 çул çитнине халалласа‚ вĕсем Мурманск хулинчен яхтăпа çурçĕр тинĕсĕ тăрăх Франц-Иосиф çĕрĕсем еннелле экспедицие кайма палăртаççĕ‚ 100 çул ытла çухалнă «Святая Анна  чаплă шхунăна шыраса тупасшăн. Шăпах унпа Валериан Альбанов тинĕсре ишсе çÿренĕ те. Экспедици членĕсем экипаж йышне пирĕн республикăн представителĕсене кĕртме сĕннĕ. Яхта Раççей тата Пушкăртстан ялавĕсемпе тинĕсе тухĕ.

ПР Пуçлăхĕ Вырăс географи обществин регионти уйрăмне республика çыннисенчен тăракан экипажăн йышне йĕркелеме хушу панă.

Ĕпхÿ хулинче çуралса ÿснĕ Валериан Альбанов 1912-1914 çулсенче «Святая Анна» шхуна çинче Георгий Брусилов экспедицине хутшăннă. Шхуна Карск тинĕсĕнчи пăр катрамĕсем хушшине кĕрсе ларнă. В.Альбанов  сывă тăрса юлнă.