Официаллă мероприятисенчи тÿре-шарасен апатланăвĕ 13 млн тенке ларĕ

Пушкăртстан чиновникĕсене официаллă ларусене, канашлусене тата ытти мероприятисене хутшăнакансене апатлантарма республика бюджетĕнчен 13 млн тенкĕ ытла укçа уйăрнă. Çак çăмăллăхăн килĕшÿ докуменчĕсене патшалăх сутăн илнисен (госзакупки) сайтĕнче Пушкăртстан Пуçлăхĕн ĕçĕсен управленийĕ ячĕпе вырнаçтарнă.

2021 çулхи декабрь уйăхĕн 31-мĕшĕччен аукционра çĕнтернĕ компани апат-çимĕç сĕтелне хатĕрлеме, пÿлĕме тирпей-илем кÿртме, мероприяти умĕн тата ун хыççăн залсене çуса тасатма сăмах парĕ.

Çавăн пекех документсенче уйрăм апат-çимĕç тĕсĕсем (ирхи апатсенчен пуçласа, çырткаламалли тата каçхи апатсем таран), вĕсен виçи, усă курмалли апат-çимĕç таран çырнă.

Çакăн евĕр апат-çимĕç сутăн илессине Пушкăртстан Пуçлăхĕн ĕçĕсен управленийĕ çулталăкне темиçе хутчен йĕркелет.

Автор:Инга Алексеева

Читайте нас

Новости партнеров