Сăмах кунта Пушкăртстан Конституцин 87-мĕш статйи – Республика Пуçлăхĕн полномочийĕ - пирки пырать. Хальхи вăхăтра парламентпа калаçса татăлмасăрах премьер-министр хăйĕн çумĕсен кандидатурисене регион ертÿçине сĕнет, вăл вара вĕсене хăйĕн указĕпе çирĕплетет.
Çĕнĕлĕхĕн авторĕсем - ПР Патшалăх Пухăвĕн председателĕ Константин Толкачев, унăн çумĕсем Эльвира Аиткуловапа Рустам Ишмухаметов тата Гульнара Бикбулатова депутат. Рустам Ишмухаметов каланă тăрăх, тÿрлетÿ кĕртни кадрсен ыйтăвне татса парас ĕçре парламентăн пĕлтерĕшне тата пĕрлехи яваплăха вăйлăлатать.
- Ĕç тăвакан органсен, сĕннĕ кандидата ирттерес тесен, çаврăнăçуллă пулма тивет тата парламентăн политика пулăшăвĕ кирлĕ пулать, - тенĕ вице-спикер.
Унăн ĕçтешĕ те хăйĕн шухăшне пĕлтернĕ.
- Регионсен тĕп законĕсене çакăн евĕр улшăнусем кĕртни вăл – пĕтĕмĕшле тренд, - тесе шутлать Эльвира Аиткулова. - Вăл Раççей Конституцине çĕнĕлĕхсем кĕртнĕ хыççăн аталанма пуçларĕ. Унта Федераллă Пухăвăн пĕлтерĕшне вăйлăлатнă. Çакă тĕрĕс те. Эпĕ шутланă тăрăх, Патшалăх Пухăвĕ регион бюджетне йышăнать пулсан, эпир, депутатсем, вăл е ку сферăна кам ертсе пынине тата законпа программăсене мĕнле пурнăçланине пĕлсе тăмалла.
Юрий МИХАЙЛОВ.