2022 çулхи канмалли кунсене çирĕплетнĕ

Министрсен кабинетĕнче палăртнă тăрăх,  ĕçлемен уяв кунĕсемпе тÿр килекен январь уйăхĕн 1-2-мĕшĕсене (шăмат кунпа вырсарни кун) май уйăхĕн 3-10-мĕшĕсене, март уйăхĕн 5-мĕшне (шăмат кун)  март уйăхĕн 7-мĕшне, тунти куна, куçарĕç.

Çапла вара Çĕнĕ çул уявĕсем 2021 çулхи декабрь уйăхĕн 31-мĕшĕнчен пуçласа 2022 çулхи январь уйăхĕн 9-мĕшĕччен тăсăлĕç. Май уяв кунĕсен пĕрремĕш тапхăрĕнче тăватă кун, апрель уйăхĕн 30-мĕшĕнчен пуçласа май уйăхĕн 3-мĕшĕччен, иккĕмĕш тапхăрĕнче  татах тăватă кун, май уйăхĕн 7-10 мĕшĕсенче, канăпăр.

Февраль уйăхĕнче Раççей çыннисем 23-мĕш числора, март уйăхĕнче 6-8-мĕшĕсенче ( шăмат куна, 5-мĕшне тунти куна куçарĕç) канĕç. Çавăн пекех виçшер кун июнь уйăхĕн 11-13-мĕшĕсенче, ноябрь уйăхĕн 4-6-мĕшĕсенче канмалли кунсем пулĕç.

Кăçалхи декабрь уйăхĕн 31-мĕшне канмалли кун тесе пĕлтернĕ. Маларах РФ Ĕç тата социаллă хÿтĕлев министрĕ Антон Котяков  Ĕç министерстви декабрь уйăхĕн 31-мĕшне канмалли кун тăвассипе çыхăннă ыйтăва пăхса тухма шантарни çинчен пĕлтернĕччĕ. 2022 çулта декабрь уйăхĕн 31-мĕшĕ канмалли кун пулать, мĕншĕн тесен вăл шăмат куна лекет.

Надежда РОДИОНОВА.