Республикăра Патшалăх Думине суйламалли участоксем ĕçле пуçланă

Енчен те çын Раççейре регистраци иртмен пулсан, вăл Ĕпхÿ хулинчи Посадская урам, 26-мĕш çурт адреспа вырнаçнă участока килме пултарать. 272 ял-паççулкасенче 30 пин суйлавçă куçса çÿрекен автобус-участокĕсенче сасăлĕç. Вырăнтан вырăна куçса çÿреме йывăр çынсем патне участокри суйлав комиссийĕн членĕсем хăйсем килĕç.

Суйлав виçĕ кун – сентябрь уйăхĕн 17-19-мĕшĕсенче - иртесси  çинчен «Урал сасси» хаçат маларах пĕлтернĕччĕ. Унта регионти 3 млн ытла суйлавçă хутшăнмалла, вĕсенчен 43 пинĕшĕ пуçласа сасăлать.

Пушкăртстан территоринче РФ Патшалăх Думин депутачĕсемсĕр пуçне ПР Патшалăх Пухăвĕн «халăх тарçисене» 29-мĕш Толбазă, 43-мĕш Краснохолмск, 55-мĕш Буйск округсенче суйлĕç. Çавăн пекех суйлавçăсем Ĕпхÿ, Бирск тата Белорецк хулисен Канашĕсен тата хăш-пĕр ял Канашĕсен депутачĕсемшĕн сас парĕç. Пурĕ 175 кампани иртмелле, вĕсенче 312 мандата пайлĕç тата ун çумне партисен списокĕпе сасаланине хушмалла.

Юрий  МИХАЙЛОВ.