Кăмпа пуçтарма кайнă икĕ хĕрарăм вăрманта аташнă

Ведомствăн пресс-служби пĕлтернĕ тăрăх‚ 51 тата 62 çулхи хĕрарăмсем вăрмана кăмпа пуçтарма кайнă. Вĕсем унта вăрман ăшне кĕрсе кайса аташнине асăрхаман.

 - Хĕрарăмсен аллинче мобильлĕ телефон пулнă. Вĕсенчен пĕри ывăлĕпе çыхăнăва тухнă‚ хăйсем инкеклĕ лару-тăрăва лекнине пĕлтернĕ. Арçын вахтăра пулнă май вăрах шухăшламасăр хăтаруçăсенчен пулăшу ыйтнă. Çав вăхăтрах вăл амăшне хăйсем ăçта пулнине палăртма инструкци панă‚ даннăйсене хăтаруçăсене пĕлтернĕ – тенĕ Пушкăртстан Республикинчи Инкеклĕ лару-тăру енĕпе ĕçлекен патшалăх комитетĕнче.

Хăтаруçăсем координатсем тăрăх вăрманта çухалса кайнă хĕрарăмсене тупнă‚ вĕсене унтан тухма пулăшнă.