Раççейре 2022 çулта ача пăхнăшăн тÿлекен пособи виçи ÿсет

Февраль уйăхĕн 1-мĕшĕнчен Раççейре пĕчĕк ачана пăхнăшăн уйăхсерен тÿлекен пособи виçи 5,8 % ÿсмелле, вăл 7 493 тенкĕпе танлашĕ. Чи пысăк тÿлев 31 282 тенкĕ пулĕ. Çакăн çинчен ТАСС Шутлав палатин «Социаллă страхлав фончĕн 2022 çулхи тата 2023-2024 çулсенчи тапхăрта планпа палăртнă бюджечĕ» официаллă хутри цифрăсене асăнса пĕлтерет.

Хальхи вăхăтра çак тÿлев чи пĕчĕкки 7 083 тенкĕ шутланать (Пушкăртстанра - 8140 тенкĕ), чи пысăкки - 29 600 тенкĕ. Çÿлерех асăннă документа тишкернĕ май, çакна курма пулать: пĕчĕк ачана çулталăк çура çитиччен пăхнăшăн уйăхсерен паракан пособисем тÿлеме пĕтĕмĕшле 169,5 млрд тенкĕ тăкакланать.

Унсăр пуçне февраль уйăхĕн 1-мĕшĕнчен ача çуралсан пĕр хут паракан пособи виçи те 5,8 % ÿсет, вăл 19 981 тенкĕ пулмалла. Çак тÿлеве пурнăçа кĕртме 19,8 млрд тенкĕ кирлĕ. Паянхи кун пособин виçи 18 886 тенкĕпе танлашать.

Юрий МИХАЙЛОВ.

Автор: Юрий Михайлов

Читайте нас