Вакцина тунисем сахалрах районсене пĕлтернĕ

Пушкăртстан Правительствин сайчĕ пĕлтернĕ тăрăх, региона 2 454 788 доза хамăр çĕршывра туса кăларнă вакцина илсе килнĕ. Ноябрь уйăхĕн 25-мĕшĕ тĕлне пĕрремĕш компонентпа 1 934 880 çын прививка тунă. 1 667 185 çын вакцинацине пĕтĕмпех вĕçленĕ. Процентсемпе пăхас пулсан, 77,9% тата 67,1%. Пĕр талăкра пурĕ 30 488 çын прививка тунă.

Регионта кăшăлвирус инфекцийĕ сарăласран асăрханассипе ĕçлекен оперативлă штаб ларăвĕнче ПР сывлăх сыхлав министрĕн çумĕ Азат Рахматуллин çĕнĕ кăшăлвирус инфекцийĕнчен прививка тăвассипе малта тата кайра пыракан районсене пĕлтернĕ.

- Кăшăлвируспа чирлекенсен шучĕ уйрăмах Пишпÿлек, Бакалă, Пелепей, Федоровка, Белорецк тăрăхĕсенче йышлă, мĕншĕн тесен шăпах çак районсенче вакцина иртнисен проценчĕ пĕчĕк, - пĕлтернĕ Азат Рахматуллин. – Вакцина тутарнисен проценчĕ Буздяк, Элшей, Чишма, Чекмагуш, Ĕпхÿ районĕсенче пысăкрах пулнине палăртмалла.

Пушкăртстанри тĕп патшалăх санитари врачĕ Анна Казак палăртнă тăрăх, паян кун тĕлне республикăра чирлекенсен шучĕ пĕр шайра тăрать.

- Хальлĕхе ку пулăм çирĕп мар-ха. Прививка мероприятийĕсене вăйлатас пулать. Лару-тăру шайлашни эпир санитарипе эпидемиологи мероприятийĕсене тĕрĕс йĕркелесе пынине çирĕплетет, - пĕлтернĕ Анна Казак.

ПР Правительствин премьер-министрĕ Андрей Назаров COVID-19 чирĕпе чирленине палăртма тест ирттересси чакнине асăрханă.

«100 пин çын пуçне 248 тест тÿр килет. Информаци тĕрĕсрех пултăр тесен кашни кун 100 пин çын пуçне 300 лаборатори тесчĕ ирттермелле, - палăртнă Андрей Назаров. – Çав вăхăтра вакцинаци хăвăртлăхне те ÿстермелле. Çĕнĕ çул уявĕсем умĕн ку уйрăмах пĕлтерĕшлĕ.

Надежда РОДИОНОВА.