- Çĕнĕ çулччен строительсем Яшерганово, Сарайсино ялĕсенче ФАПсен тăррисене витнĕ. Хĕллехи канмалли кунсем хыççăн объектсенче якату-илемлетÿ ĕçĕсене пурнăçлама тытăннă. Сăмахран, урайне бетон сарассине, стенасене якатассине тата ытти ĕçсене, - каласа панă Çтерлĕпуç районĕн администрацинче.
2022 çулта Пушкăртстанра наци проекчĕсене пурнăçлама рекордлă нухрат – 35 млрд тенкĕ тăкаклама палăртаççĕ. Çакăн çинчен республика правительствин вице-премьерĕ Илшат Тажитдинов социаллă сетьсенче çырса кăларнă.
- Мĕн кĕтмелле-ха наци проекчĕсенчен? Кăçал 44 модульлĕ ФАП, сывлăх сыхлав системи валли пиншер оборудовани, 85 автомобиль туянма палăртаççĕ. Ĕпхÿ хулинче, Баймак, Кармаскалă, Дуван районĕсенче 4 поликлиника, Мечетлĕ районĕнче больница, Ĕпхÿри «Хĕвелтухăç-Затон» микрорайонĕнче шкул хăпартĕç.
Çавăн пекех Çтерлĕпе Ĕпхÿ хулисенчи гимназисене юсас, Ачасен онкологипе гематологи центрне хăпартас, Ĕпхÿри пуканесен театрне çĕнетес ĕçсене пурнăçа кĕртĕç.
- Çул-йĕр тăвассипе те пысăк плансем пур. «Бирск-Тастуба-Сатка» автомобиль çулне сарма, Ĕпхÿ хулинчен «Урал» М-5 трасса çине тухакан «Хĕвелтухăç çулне» тума палăртаççĕ. Парксемпе скверсенче тирпей-илем кĕртес ĕçсене те мала кăларасшăн. «Раççей çамрăкĕсем», «Сывлăх сыхлавĕн пĕрремĕш звенине çĕнетесси», «Туризм инфраструктурине çĕнетесси» çĕнĕ проектсем пур. Вĕсене туллин те тĕплĕн пурнăçласан аван пулĕччĕ, - пĕтĕмлетнĕ Илшат Тажитдинов.
#Башкортостан#Уралсасси#нацпроект#здравохранение