Хăрушлăх зонине лекнĕ

– Республика кăшăлвируспа чирлессипе черетлĕ йывăр лару-тăрăва кĕрсе пырать. Пĕтĕмĕшле СOVID-19 инфекципе чирленисен шучĕ январь уйăхĕн 25-мĕшĕ тĕлне 128 050 çынна çитнĕ. Юлашки талăкра çеç çак чирпе чирленисен шучĕ 388-па танлашнă. Пĕтĕмĕшле сывалнисем – 118 711 çын, вĕсенчен 259-шĕ иртнĕ талăкра, – тенĕ ведомство ертÿçи.
Регионта чирлĕ çынсене сиплеме 2250 инфекци вырăнĕ хатĕрленине палăртмалла. Унсăр пуçне резервра 8 пин вырăн пур. Çавăн пекех чирлисене пĕтĕмпех сыватма та реабилитаци иртме 4 пин вырăн йĕркеленĕ.
Максим Забелин каланă тăрăх, республикăра «омикрон» штамĕ сарăлни поликлиникăсенчи ĕç тиевне (нагрузка) ÿстернĕ. Стационарсенче лару-тăру çăмăлрах. Çав вăхăтрах госпитальсене сипленме килнисен шучĕ иртнĕ эрнере 3,7% ÿснĕ.
Регион ертÿçипе калаçса татăлнă хыççăн вăхăтлăха диспансеризаци иртессине чарнă. Çавăн пекех поликлиникăсенче производство практики иртме Пушкăрт патшалăх медицина университечĕн пĕр пин ординаторне тата икĕ пин студентне яма хатĕрленеççĕ.
Юрий СНЕГОПАД.