Вирусолог кăшăлвирусăн хăвăрт ерекен штамĕсем пулассине пĕлтернĕ

Кăшăлвирус хăйĕн аталанăвне малалла тăсĕ. «Омикрон» унăн юлашки штамĕ пулмĕ. Эволюци иртнĕ май хăвăрт та анлă сарăлакан штам килсе тухĕ. Çакăн çинчен Спутник радиопа РАН член-корреспонденчĕ, В. А. Энгельгардт ячĕллĕ Молекулярлă биологи институчĕн клеткăсен пролифераци лабораторин заведующийĕ Петр Чумаков вирусолог каланă.

Ун шучĕпе, SARS-CoV-2вирус аталаннă май этемсен популяцине хăнăхса пырать. Сăмахран, Ухань штамĕ ытларах ватă çынсене ураран ÿкернĕ пулсан, «альфа» британи тата ытти штамсем çынсен ытти ÿсĕмĕсене те хĕрхенмеççĕ. Халĕ COVID-19 тĕрлĕ ÿсĕмри çынсен иммунитетне те «çапса çĕмĕрнĕ», апла пулсан çынсене хăнăхса çитнĕ. «Омикрон» час ерекен чире çаврăннă, вăл ачасен иммунитетне те çĕнтерме тытăннă.

- Кăшăлвирус малалла улшăнать. Аталану тапхăрĕсенче чирлеттерекен енĕсене майĕпен çухатать. Çав вăхăтрах хăвăртрах та анлăрах сарăлма пуçлать, маллалла та çапла пуласси куç кĕрет, - тенĕ Петр Чумаков. - Анчах та унран сыхланас мелĕ малтанхи пекех прививка шутланать. COVID-19 йывăр чиртен упранас тесен кашни çур çултан ревакцинаци иртмелле.

Пушкăртстанра 2 484 667 çынна (пурĕ 18 çултан иртнисем 3 105 836 çын) кăшăлвирусран вакцинаци ирттерме палăртнă. Региона COVID-19 чиртен 2 914 858 вакцина дози çитнĕ. Пĕрремĕш компонента - 2 390 684 çын (96,2%), иккĕшне те 2 229 194 çын (89,7%) тутарнă.

Автор: Инга Алексеева

Читайте нас