Выляса-кулса çул-йĕр правилисене вĕренетпĕр

Мĕн пĕчĕкрен ачасене çул-йĕр правилисене вĕрентетпĕр. Ача садĕнче шăпăрлан çул юхăмĕн тĕп ăнланăвĕсене, çавăн пекех хăйне çул çинче тĕрĕс тытма хăнăхассине ăша хывмалла.

Урамри çулсем çинчи юхăм ачасемшĕн хăрушлăх кăларса тăратать. Çавăнпа та вĕсене урамра çÿренĕ чух хăйсене яваплă тыткалама хăнăхтарасси, çул-йĕр правилисене пăхăнасси пĕлтерĕшлĕ пулнине яланах асăрхаттарса тăмалла.
Пирĕн ушкăнра кунсерен хамăра çул çинче тĕрĕс тытмалли правилăсем пирки калаçусем иртеççĕ. «Мĕншĕн светофор тата çул-йĕр паллисем кирлĕ? Çул çинче выляма юрать-и? Мĕншĕн выляма юрамасть?» евĕр ыйтусем çине хуравсем шыратпăр.
Ачасен çул-йĕр çинчи хăрушсăрлăхĕпе çыхăннă ĕçе системăллă туса ирттеретпĕр. Вăл вара ача-пăча ĕçĕ-хĕлĕн мĕнпур тĕсĕсене те пырса тивет. Çапла майпа ачасем илнĕ пĕлĕве хăйсем витĕр «кăлараççĕ», унпа вăйăсенче тата кулленхи пурнăçра усă кураççĕ.
Елена ГРИГОРЬЕВА, Алена СОЛОДСКАЯ воспитательсем.
Çтерлĕ районĕ, Рощинский ялĕ.