Сывлăх сыхлав министрĕ эмелсен хакĕсемпе мĕн пулассине пĕлтернĕ

Паян, март уйăхĕн 23-мĕшĕнче, «Ăнлантарса паратпăр. Пушкăртстан» («Объясняем. Башкортостан») проект шайĕнче иртнĕ тÿрĕ эфирта Пушкăртстан Правительствин премьер-министрĕн çумĕ - сывлăх сыхлав министрĕ Максим Забелин санкци условийĕсенче эмелсен хакĕсемпе мĕн пуласси çинчен каласа панă.

Министр сăмахĕсем тăрăх, эмелсен хакĕсем ÿсме пултараççĕ. Çав вăхăтрах пурнăçшăн пысăк пĕлтерĕшлисен (çав шута 800 ытла препарат кĕрет) хакĕсене патшалăх тимлесе тăрĕ.

Хальхи вăхăтра республика аптекисенче эмелсем çитменни палăрмасть тенĕ ПР Сывлăх сыхлав министерствин ертÿçи. Халăх ытларах усă куракан препаратсем вăхăтлăха пулмасса пултараççĕ. Республикăри Сывлăх сыхлав министерстви Тарифсем енĕпе ĕçлекен патшалăх комитечĕпе тата Раççейри сывлăх сыхлав надзорĕн Пушкăртстанри уйрăмĕпе пĕрле аптекăсенче препаратсем пуррипе çуккине тĕрĕслесе тăрать.

Сăмахран, халăх щит евĕрлĕ парсене (щитовидная железа) сиплеме «Левотироксинпа» анлă усă курать. 2021 çулта республикăра пурăнакансене çакăн йышши 52 пин препаратпа тивĕçтернĕ. Кăçал вара ăна аптекăсене 10% ытларах илсе килнĕ.

Автор: Ирида Матниязова

Читайте нас