60 çултан иртнĕ 70 арçын тата 44 хĕрарăм пуçласа çемье çавăрнă

 - Иртнĕ çулхине 60 çултан иртнĕ 722 арçын тата 462 хĕрарăм хăйсен туйăмĕсене хут çине куçарнă. Вĕсенчен 70 арçын тата 44 хĕрарăм пуçласа мăшăрланнă, - тенĕ Пушкăртстанстатăн тĕпчевĕнче.

Çав вăхăтрах ватăсен хушшинче ытларах хĕрарăмсем пулнине палăртса хăвармалла. Сăмах май, 2022 çул пуçламăшĕнче 60 çултан иртнĕ хĕрарăмсен шучĕ 550,5 пинпе танлашнă, арçынсен – 332,2 пинпе. Асăннă ÿсĕмре кашни пин арçын пуçне 1 657 хĕрарăм килсе тухать (60-74 çулхисем – 1 445, 75-89 çулхисем – 2 651, 90 çултан аслисем – 3 765).

 - Арлăхсен шайлашăвĕ (половое соотношение) начарланни арçынсем ытларах вилнипе çыхăннă, - тенĕ республикăри статистиксем.  – Арçынсен, хĕрарăмсемпе танлаштарсан, пурнăç тăршшĕ те кĕскерех. Иртнĕ çулхине Раççейре çак уйрăмлăх 9 çулпа танлашнă, Пушкăртстанра – 9,34 çулпа.

2022 çул пуçламăшĕнче республикăра 882,7 пин аслă ăру çынни пурăннă. Вĕсен шутĕнче 60-74 çулхисем - 678,2 пин çын, 75-89 çулхисем - 185,5 пин çын. Тата 19 пинĕ вăрăм ĕмĕрлисем шутланаççĕ, вĕсенчен 468-шĕ 100 çул урлă каçнă.

Пушкăртстанра 2022 çул пуçламăшĕнче 60 çултан иртнисен пайĕ 22,1 процентпа танлашнă. Раççейре çак кăтарту пысăкрах – 23,1 процент (33,7 млн çын).

1990 çулхи декабрь уйăхĕн 14-мĕшĕнче ООН Тĕп Ассамблейи октябрĕн 1-мĕшĕ Ваттисен кунĕ тесе йышăннă. Уявăн тĕп тĕллевĕ - ватăсене сума сăвассси, аслă ăрури çынсене тĕл пулакан йывăрлăхсене татса пама тимлĕх уйăрасси.

Асăннă уявăн хăйĕн логотипĕ пур - уçă ал тупанĕ, ку вара ыркăмăллăхпа пулăшу символĕ.

Пĕтĕм тĕнчери сывлăх сыхлав организацийĕн классификацийĕпе килĕшÿллĕн 60-74 çулхисем çулланă çынсен шутне кĕреççĕ, 75-89 çулхисем – ватăсем, 90 çултан аслисем – вăрăм ĕмĕрлисем. ООН тата Пĕтĕм тĕнчери ĕç организаци докуменчĕсем тăрăх, 60 çултан иртнисем – çулланă çынсем.