Пушкăртстан аграрийĕсем кĕрхи ĕçсене вĕçлесе пыраççĕ

«Пушкăртстанра тырă тата пăрçă йышши культурăсене 1 млн та 140 пин гектар çинчен пуçтарса илнĕ. Çакă акса ÿстернĕ тыр-пулăн 80% танлашать.  Хальхи вăхăт тĕлне аграрисем 2,5 млн тонна тыр-пул пухса илнĕ. Унăн вăтам тухăçĕ гектар пуçне 22 центнерпа танлашать. Давлекан, Гафури, Бакалă, Нуриман, Татăшлă, Ермеккей, Буздяк, Илиш районĕсенче кĕрхи ĕçсене вĕçлесе пыраççĕ. Чи нумай тыр-пула Çтерлĕ районĕнче, пурĕ 150 пин тонна, пуçтарса илнĕ. Илиш, Чекмагуш, Давлекан тата Мелеуз  районĕсенчи ял хуçалăх предприятийĕсем 100 пин ытла тонна вырса пуçтарнă. Çĕнĕ тухăç пÿлмесенче упранать», - çырнă Радий Хабиров хăйĕн социаллă сетĕнчи страницинче.

Çавăн пекех республика ертÿçи сахăр кăшманĕн рекордлă тухăçне кĕтнине пĕлтернĕ. Пылак тымар çимĕçе пур лаптăкăн (17 пин гектар) 30% çинчен кăларса илнĕ. Хальлĕхе 770 пин тонна кăшман кăларнă, вăтам тухăç - гектар пуçне 450 центнер.