Çĕнĕ хисеплĕ ятсем йышăнĕç

Пушкăртстанра туризм индустрийĕн чи лайăх специалисчĕсемшĕн «Пушкăртстан Республикинчи туризм сферин тава тивĕçлĕ» ĕçченĕ çĕнĕ хисеплĕ ят çирĕплетĕç.

ПР Патшалăх Пухăвĕн - Курултайĕн пресс-служби пĕлтернĕ тăрăх, ăна пысăк професси ăсталăхĕшĕн тата асăннă отрасльте нумай çул хушши тÿрĕ кăмăлтан ĕçленĕшĕн парĕç. «Пушкăртстанри патшалăх наградисемпе хисеплĕ ятсем» çинчен калакан саккуна улшăнусем кĕртессине Курултай депутачĕсем октябрь уйăхĕнчи тĕп ларура пăхса тухĕç.

«Республикăра паянхи кун туризм хăвăрт аталанать. Туризм отраслĕн ĕçченĕсем Пушкăртстан хăнасене яланах тарават пулнине, пирĕн патра канма, çул çÿреве тухма хăрушă мар иккенне ĕçпе çирĕплетеççĕ. Вĕсем ыттисемпе тупăшма пултаракан туризм индустрине аталантарас, туризм сервисĕпе турист продукчĕн пахалăхне ÿстерес тĕлĕшпе пысăк тÿпе хываççĕ. Хисеплĕ ята çирĕплетни професси сумне ÿстерме, асăннă отрасле аталантарма пулăшĕ», - тет регион парламенчĕн депутачĕ Константин Толкачев.