Çтерлĕпуç районĕнче сырлан (облепиха) ĕрчетĕç

Пушкăртстан Республикин Пуçлăхĕ Радий Хабиров хăйĕн социаллă сетĕнчи страницинче  предприниматель «Пушкăртстан çырли»  пысăк масштаблă инвестици проектне пурнăçлама тытăнни пирки пĕлтернĕ. Предпринимателĕн сĕнĕвне май уйăхĕнче Сибай хулинче иртнĕ «Ивестици сехетĕнче» пăхса тухса малашлăхлисен шутне кĕртнĕ. ПР Çĕрпе пурлăх министерстви  сад ĕрчетме çĕр лаптăкне суту-илÿ ирттермесĕрех пама йышăннă.

«Асăннă проекта пурнăçа кĕртме 900 млн тенкĕ хывнă. Çитменнине инвестор вăрах вăхăт ĕçлет – аграрисем малтанхи тухăçа икĕ-виçĕ çултан çеç илме пултараççĕ. Проект пысăк, çырла сачĕсем валли 759 гектар уйăрма палăртнă. Çĕрсене ĕçе кĕртме пуçланă – 48 гектар лаптăк çинче пĕр облепиха сачĕ хывма ĕлкĕрнĕ, халĕ 10 гектар çинче 20 пин хунав лартаççĕ. 4,4 гектарĕ çĕр çырлин теплицине  вырнаçтарма каять. Тепĕр утăм – продукцие упрассипе тирпейлессин тулли циклне йĕркелесси. Пуçару интереслĕ, пирĕн предпринимательсем çĕнĕ, халиччен пулман сăнавсем туса пахма хăраманшăн савăнатăп. Пирĕн тĕллев  – вĕсене пулăшасси», - палăртнă Радий Хабиров.

Çур çул каялла «Пушкăртстан çырли» тата «Титан» компанисен ертÿçи Егор Рязанцев Çтерлĕпуç районĕнче облепиха çеç мар, çĕр çырли ÿстерессипе çыхăннă плансемпе те паллаштарнă. Сад культурисене интенсивлă сад ăсталăхĕн технологийĕсемпе усă курса ĕрчетеççĕ. Предприятийĕн планĕнче – рынок ыйтакан облепиха çырли туса илесси.

«Республикăри хăш-пĕр районсенче çырла ÿстереççĕ. Хаваспах асăннă çул-йĕре аталантарма пулăшăпăр», - тенĕ Радий Хабиров.