СВОна хутшăнакансемпе вĕсен çемйисене халаллĕç

«Çитес çула камсене халаллассине сÿтсе явса кирлĕ йышăну турăмăр. Ман пата Шаймуратов генерал орден кавалерĕсен клубĕпе СВОри салтаксем сĕнÿпе тухрĕç. Çывăх вăхăтра ĕçсемпе мероприятисем ирттерме палăртнă указа алă пусăп», - тенĕ регион ертÿçи.
Пушкăртстанри обществăлла палатăн председателĕ, ПАГСУ ректорĕ Данияр Абдрахманов республика пуçлăхĕн йышăнăвĕ тĕрĕс тата ăнланмалла пулнине палăртнă: «Пирĕн республика ятарлă çар операцине хутшăнакансемпе вĕсен çемйисене пĕрремĕш кунранах пулăшать. Çакă ăс-хакăлпа кăмăл-сипет, çемье хаклăхĕсене упраса хăварас ĕçшĕн те пысăк пĕлтерĕшлĕ. Çăмăл мар лару-тăрăва лекнĕ çемьесем патшалăх пулăшăвне туйса тăччăр», - тенĕ вăл.
ПР обществăлла палатăн пайташĕ Владимир Волков та 2025 çула ятарлă çар операцине хутшăнакансемпе вĕсен çемйисене халаллани питĕ вăхăтлă тесе шутлать. Ун сăмахĕсем тăрăх, СВО участникĕсемпе вĕсен çемйине пулăшас енĕпе Афган, Чечен вăрçин йăнăшĕсене тепĕр хут тумалла мар. Çак ĕçе вăрçă иртсе пĕтсен мар, халь пурнăçламалла.
Надежда РОДИОНОВА.