ППМИ - 2025 пулăшнипе Çĕнтерÿ мемориалне юсас ĕçе вĕçлессе шанатпăр

Пелепей тăрăхĕнчи Слакпуç ялĕнче пуху иртрĕ. Унта вырăнти пуçарусене пулăшса пыракан программăна (ППМИ - 2025) хутшăнасси пирки ыйту çĕклерĕмĕр. Ял çыннисем çултан çул ППМИ программăна хутшăнса хăйсен ĕмĕчĕсене пурнăçа кĕртеççĕ.

Асăннă программа пулăшнипе юлашки çулсенче Краснояр ялне каякан çула çĕнетрĕмĕр, спорт тата ача-пăча лапамĕ туса лартрăмăр, шкул чÿречисене улăштартăмăр, Çĕнтерÿ мемориалне юсама тытăнтăмăр. Çак ĕçе пурнăçланă май Тăван çĕршывăн Аслă вăрçине хутшăннисен списокне пуянлатрăмар. Халĕ мрамор плитасем çине Слакпуç ял Канашĕнчен вăрçа кайнă 700 çын ятне касса кăларнă. Анчах та укçа-тенкĕ çитменнипе плитасене кивĕ, ишĕлекен стенасем çинех вырнаçтармалла пулчĕ. Кăçал Аслă Çĕнтерÿ 80 çул тултарнине тивĕçлĕ кĕтсе илес шутпа юсав ĕçне вĕçлеме шутлатпăр.Хамăрăн укçа-тенкĕ сахалрах пулнăран ППМИ - 2025 программăна хутшăнса çĕнĕ стена хăпартма, ун патне электричество çути ирттерме, плакатсене, йĕри-тавра тытнă картана çĕнетме палăртатпăр. Конкурс витĕр ăнăçлă иртсе Аслă Çĕнтерĕве 80 çул çитнĕ тĕле мемориала юсаса пĕтерессе шанатпăр.

Вера Павлова, Слакпуç ял хутлăхĕнчи ветерансен Канашĕн председателĕ.

Пелепей районĕ.

#ППМИ2025#РеспубликаБашкортостан#Белебеевский район#слакбашскоесельскоепоселение