ПР чăваш çамрăкĕсен пĕрлĕхĕн çĕнĕ ертÿçине суйларĕç

Январь уйăхĕн 28-мĕшĕнче Ӗпхӳре Пушкăртстан Республикинчи Халăхсен туслăх çуртĕнче ПР чăваш çамрăкĕсен пĕрлĕхĕн пухăвĕ иртрĕ. Ăна ПР чăвашсен Канашĕн председателĕ И.В. Сухарева профессор ертсе пычĕ. Ларăвăн ĕçне ПР Халăхсен туслăх çурчĕн директорĕн наци ыйтăвĕсен ĕçĕсене илсе пыракан Альбина Агишева тата паллă ÿнерçĕ Галина Калимуллина хутшăнчĕç.

Лару вăхăтĕнче çамрăксем нумай ыйту сÿтсе яврĕç. Çав шутра тăван халăхăмăрăн чĕлхипе культурине сыхласа хăварасси пирки малалла та ĕçлесси, 2025 çулхи паллă та çавра юбилейсемпе çыхăннă мероприятисемсĕр пуçне çамрăксен форумне ирттересси çинчен те сăмах хускатрĕç. Унсăр пуçне çамрăксен форумĕн логотипĕсен тĕрлĕ варианчĕсене тата ытти йĕркелÿ саманчĕсене сÿтсе яврĕç.

Çавăнтах ПР чăваш çамрăкĕсен Канашĕн çĕнĕ ертÿçине Арсений Иванова тата унăн çумĕсене çирĕплетрĕç.

Арсений Иванов 2006 çулхи май уйăхĕн 4-мĕшĕнче Пишпÿлекре çуралнă. Хальхи вăхăтра Ĕпхÿ патшалăх нефтьпе техника университетĕнче пĕрремĕш курсра вĕренет. Вăл информаци хăрушсăрлăхĕпе ĕçлекен специалист пулма ĕмĕтленет.

ПР чăвашсен Канашĕн пресс-служби.