Авалхи çемье рецепчĕпе çăкăр пĕçереççĕ

Иртнĕ çул Благовещенск районĕнчи Удельно-Дуваней ялĕнчи Данил Уланов çамрăк предпринимательпе Кристина мăшăрĕ çĕнĕ пекарня уçнă. Улановсем университетра вĕренеççĕ. Çамрăксем вĕреннĕ вăхăтрах хăйсен ĕçне уçма шутланă. Ку вĕсемшĕн ахаль бизнес çеç мар, çăкăр пĕçерес йăла-йĕркене малалла тăсни те.

Данил амăшĕ Наталья Уланова – опытлă предприниматель. Вăл ялта лавккапа кафе тытать. Хĕрарăм ывăлне хăй ĕçне йĕркелеме пулăшнă. Данилпа Кристина çемйисенчи ăруран-ăрăва куçса пынă рецептсемпе тата йăла-йĕркесемпе хавхаланса кайнă. Вĕсем ял çыннисене тин пиçсе тухнă çăкăр, хăтлă кил-çурт лару-тăрăвне сĕннĕ. Предпринимательсем пĕччен пурăнакан ватă çынсене те тимлĕхсĕр хăварасшăн мар. Хăйсем тĕллĕн çÿрейменнисене социаллă ĕçченсем урлă тин пиçсе тухнă çăкăр парса ярасшăн.