Пушкăртстанра тепĕр полилингваллă шкул уçăлма пултарать

Белорецк хулинчи интернат лицейĕнче полилингваллă вĕрентÿ заведенийĕ уçăлма пултарать. Ку сĕнĕве ПР вице-премьерĕ Андрей Назаров Пушкăртстан ертÿçине парĕ. Апрель уйăхĕн 15-мĕшĕнче Белорецк хулинче правительствăн тухса çÿремелли канашлăвĕ иртнĕ. Çав вăхăтра Андрей Назаров хулари тĕп вĕрентÿ заведенийĕсенчен пĕринче пулса курнă.

Çавăн пекех республикăри Министрсен Кабинечĕн председателĕ 2026 çулта лицея Пушкăртстан ятĕнчен шкулсене тĕпрен юсассипе çыхăннă «Шкулти вĕрентÿ системисене çĕнетесси» наци проектне кĕртме сĕннĕ.

- Асăннă вĕрентÿ заведенийĕ Белорецк тата ун çывăхĕнчи Бурзян, Абзелил, Учалă районĕсемшĕн питĕ пĕлтерĕшлĕ. Общежити пурри сахал çын пурăнакан вырăнсенчи ачасене вĕренме май парĕ. Интернат лицейăн вăй-хăвачĕ питĕ пысăк. Вăл Ĕпхÿ хулинчи Рами Гарипов ячĕллĕ республикăри интернат гимнази евĕр кадрсем хатĕрлемелли вырăн евĕр пулĕ, – тенĕ ПР Правительствин премьер-министрĕн пĕрремĕш çумĕ Урал Кильсенбаев.

- Республикăри полилингваллă шкулсем чи лайăххисем пулмалла. Вĕренÿ, педагогсен йышĕн пахалăхĕсемпе те, хушма майсемпе те, пурлăх никĕсĕпе те (ку та питĕ пĕлтерĕшлĕ), - тенĕ маларах Пушкăртстан Пуçлăхĕ Радий Хабиров полилингваллă шкулсен сетьне аталантарасси пирки каланă май.