Пушкăртстан хăйне хăй апат-çимĕçпе тивĕçтерет

Правительствăн вице-премьерĕ – ПР ял хуçалăх министрĕ Ильшат Фазрахманов ПР Патшалăх Пухăвĕн-Курултайĕн ларăвĕнче пĕлтернĕ тăрăх, апат-çимĕç промышленноçĕ пурĕ 187 млрд тенкĕлĕх апат-çимĕç продукцийĕ туса кăларнă.

Регионти апат-çимĕç тирпейлекен предприятисем республикăра пурăнакансене пур тĕп апат-çимĕçпе те тивĕçтереççĕ. 2024 çул пĕтĕмлетĕвĕсем тăрăх, Пушкăртстан хăйне ÿсен-тăран çăвĕпе (8 хут), сахăр песукĕпе (6,9 хут), сысна ашĕпе (262%), ĕне ашĕпе (152%), томатпа (155%), çĕр улмипе (132%), сĕтпе тата сĕт-çу продукцийĕпе (122%), хăярпа (112%) туллин тивĕçтерет.

Апат-çимĕç продукцийĕн производстви ÿснине инвестици проекчĕсене пурнăçа кĕртни тата патшалăх пулăшăвĕ витĕм кÿрет. 2024 çулта «техникăпа тĕрлĕ хатĕрсем туяннине саплаштарасси патшалăх» программин витĕмĕпе апат-çимĕç  тата тирпейлекен промышленность предприятийĕсене 100-шер  млн тенкĕ уйăрнă. Çавна май 46 предприяти хăйсен производствисене çĕнетсе 250 техника тата оборудовани  туяннă.