Меселпуçсем вăй пĕрлĕхре пулнине лайăх ăнланаççĕ

Авăркас тăрăхĕнчи Меселпуç ял культура çуртĕнче çулталăк ытла ĕнтĕ ятарлă çар операцийĕнчи салтаксем валли маскировка тетĕлĕсем çыхас ĕç пырать. Волонтерсем ывăннине пĕлмесĕр ир те, каç та клуба килеççĕ, хăйсем çыхакан маскировка сечĕсене чун ăшшине парнелеççĕ, вĕсем малти ретри салтаксене ăшăпа хÿтлĕх паччăр тесе кĕл тăваççĕ. Кĕске вăхăт хушшинчех тем пысăкăш сакăр маскировка сечĕ çыхса Авăркас районĕнчи волонтерсен штабне леçсе панă. Вĕсене часах малти рете ăсатĕç.

Çакна та каласа хăвармалла: маскировка сечĕ çыхмалли материалсене волонтерсен тата ялти ырă кăмăллă çынсен укçи-тенкипе туяннă.

Украинăри ятарлă çар операцине хутшăнакансене май пур таран пулăшма тăрăшать халăх. Пĕрисем укçа-тенкĕпе пулăшаççĕ, теприсем кирлĕ япаласем туянса параççĕ, виççĕмĕшсем вăхăт тупса маскировка сечĕсем çыхма çÿреççĕ.

«Вăй – пĕрлĕхре» тесе ахальтен каламаççĕ пулĕ. Пĕрле темле ĕç тума та пулать. Чун ăшшине парса çыхнă маскировка сечĕсем Тăван çĕршыв хÿтĕлевçисене тем пекех кирлине меселпуçсем лайăх ăнланаççĕ.