Август – çĕр çырлине пăхмалли тапхăр

Август уйăхĕнче садра ÿсекен çĕр çырли тĕмĕсем çĕнĕ çулçă  кăлараççĕ, тепĕр çул валли чечек папки хума пуçлаççĕ. Çавăнпа ăна апатлантармалла. Апатлантарма кĕл, вĕлтрен е гумат шывĕпе шăвармалла. Азот çĕнĕ çулçă кăларма, симĕсленме кирлĕ. Фосфорпа кали калчана сахăр пуçтарма пулăшаççĕ. Çĕр çырли ăна мĕн чухлĕ нумайрах пухать – çавăн чухлĕ лайăхрах  хĕл каçать.

Çĕр çырли тĕмĕ сывă, ешĕл пулсан ăна тĕкĕнмесен те юрать. Çулçă хĕрелме пуçлани çĕр çырли чирленине пĕлтерет. Чир-чĕртен сыхланса хими препарачĕсемпе усă курмалла. Эмел сапнă хыççăн виçĕ-тăватă кунран чирлĕ çулçа касса илмелле. Анчах асăннă ĕçе çак кунсенчех тумалла. Кая юлсан çулма кирлĕ мар – калча вăй илме ĕлкĕреймĕ.   

Çĕр çинче выртакан çĕнĕ калчасем тĕме вăйсăрлатаççĕ. Çавăнпа вĕсене тухнă-тухман касса пăрахмалла. Лаптăка çамрăклатас тесессĕн çеç вĕсене хăварма юрать. Анчах та калчана пĕрремĕш çул ÿсекен ÿснĕ тĕм çинчен кăна илмелле. Икĕ-виçĕ çул лараканни çинче чир-чĕр аталанма ĕлкĕрет, вăл çамрăк калчана та куçать.  Лайăх тухăç илес тесессĕн тĕмсем таса та сывă пулмалла.

Çĕр çырлине мĕншĕн касмалла?

 - Кивĕ, чирлĕ тата сиенленнĕ çулçăсенчен хăтăлма.

 - Кăмпа чирĕсенчен сыхланма.

 - Тĕме çĕнетме, çĕнĕ çулçăсем кăларма.

 - Тухăçа ÿстерме.

Çĕр çырлине хăçан касмалла?

 - Çимĕç пама чарăнсан 5-7 кунран. Çак тапхăр июль уйăхĕн вĕçĕпе тата август уйăхĕн пуçламăшĕпе тÿр килет.

 Мĕнле тĕрĕс касмалла?

 - Çулçăсене алăпа ан туртăр! Хачăпа усă курăр.

 - Тымартан 1-2 см хăварса çулçăсене касăр

 - Тĕм варринчисене касма кирлĕ мар – ÿсен-тăран вилме пултарать.

 - Çĕнĕ калчасене касмалла.

 - Каснă хыççăн тăпрана кăпкалатмалла, тĕмсене шывпа шăвармалла.  

Ирида НОВИКОВА хатĕрленĕ.