Чăваш гимназийĕ çĕнĕ автобуспа пуянланнă

Çĕнĕ вĕренÿ çулĕ умĕн республикăри вĕрентÿ учрежденийĕсен автопаркĕсем çĕнĕ автобуссемпе пуянланнă. Ĕнер, август уйăхĕн 26-мĕшĕнче, ПР Пуçлăхĕ Радий Хабиров регионти вĕрентÿ учрежденийĕсен директорĕсене 196 автобус тата 10 çăмăл автомобиль уççисене панă.

Пелепей районĕ икĕ çĕнĕ автобус уççисене илме тивĕçнĕ. Çакă шкул ачисен пĕлÿ çулне хăтлăрах та хăрушсăртарах тума пулăшĕ. Çĕнĕ техникăллă пулнă вĕрентÿ учрежденийĕсенчен пĕри - Пелепей хулинчи чăваш гимназийĕ.

Пĕлÿ çурчĕн директорĕн тивĕçне вăхăтлăха пурнăçлакан Ольга Алматаева çĕнĕ транспортшăн кăмăлтан хĕпĕртенине пĕлтернĕ.

- Гимназире пĕтĕмĕшле 217 ача вĕренет, вĕсенчен 50-шĕ – Алексеевкăпа Илькел тата Анновка ялĕсенчен. Шăпах вĕсене кунсерен шкул автобусĕпе турттараççĕ.

Эпир республика ертÿçине çĕнĕ транспортшăн чунтан тав тăватпăр. Кивĕ автобуспа 10 çул хушши усă куртăмăр, ăна тахçанах çĕннипе улăштармаллаччĕ. Халĕ пирĕн ачасем хăйсене хăрушсăрлăхра туйма пултарĕç, - тенĕ Ольга Александровна патшалăх парнине йышăннă май.