Ÿнерçĕ кĕрхи çулçăсенчен Михаил Шуфутинский портретне тунă

Ĕпхÿре пурăнакан Евгения Сковарт ÿнерçĕ кĕрхи çулçăсенчен Михаил Шуфутинский портретне тунă. Демăри картишсенчен пĕринче пурнăçланă ĕçе вăл сентябрь уйăхĕн 3-мĕшне халалланă.

Евгения дворник сăнарĕпе урама тухнă, Галина Сазонова саксофонпа кĕвĕ каланă. Асăннă ролике ÿнерçĕ хăйĕн страницинче кăларнă. 

«Михаил Захарович маншăн музыкăри пĕтĕм кĕркунне: шухăшлаттаракан, ылтăн, кăштах хурлăхлă. Шăпах çак кăмăл-туйăмпа сентябрь çулçисемпе унăн портретне сăнласа парас килчĕ», - тесе çырнă ÿнерçĕ.  

Михаил Шуфутинский хăйĕн «Виççĕмĕш сентябрь» лирика хитне 1993 çулта итлекенсен умне тăратнă. Кĕвĕ авторĕ – Игорь Крутой, текст авторĕ – Игорь Николаев.

Сергей Карпов тата Ляйсан Шарипова Ĕпхÿ юрăçисем икĕ çул каялла асăннă юррăн пушкăрт вариантне хатĕрленĕ.  Текстне Ринат Харунов çырнă. Çавăн пекех  ăна паллă юрăç Ян Лира юрланă.